VERSICOLOR Linea

VERSICOLOR Linea

inter instrumenta Venationi inservientia, concludebat saltibus feras, vel terrebat apros, vulpes, lupos, ursos, et praecipue cervos: hinc Formido Latinis dicta est. Ovid. l. 5. Fastor. v. 173.

——— Pavidos formidine cervos.

In ea alternus plumarum, contextus, vulturis inprimis ac cycni laudatus, interdum et sandyce fucabatur. Etiam ustulabantur nonnumquam plumae, ut gravi odore amplius feram terrerent, et tunc pennae odoratae dicebantur, ut paulo post videbimus. Meminit eius M. Aur. Olympius Nemesianus, Cyneg. v. 303.

Linea quin etiam, magnos circumdare saltus

Quae possit, volucresque metu concludere praedas,

Digerit annexas non una ex alite pinnas.

Unde formidatae pinnae Ovidio, l. 15. Met. fab. 43. infin. v. 475. Colorum diversitas itaque ex avium diversarum plumis fuit, Oppianus Cilix, Cyneg. l. 1. v. 156. ubi παρτὸν illam μήρινθον vocat, e sparto tortam: quemadmodum lini septum Olympius vocat ubi supra. Multicolorem namque fuisse, ex eodem, l. 4. v. 387. probatur, ubi habet:

——— πολύχροα δείματα ςθηρῶν.

Versicolores formidines seu terriculamenta ferarum.

Vide etiam v. 403. eiusdem libri. Usum istiusmodi linearum indigitat Seneca, de Clementia, l. 1. c. 12. Sic feras lineis et pinnis conclusas contine, easdem a tergo eques telis incessat; tentabunt fugam, per ipsa, quae fugerant, proculcabuntque formidinem. Et l. 2. de ira, c. 12. Nec est mirum, cum maximos ferarum greges linea pennis distincta contineat, et insidias agat, ab ipso effectu dicta formido, vanis enim vana terrori sunt. Augustinus item, de Nupt. et Concup. l. 1. Et cum verentur infamiam falsam, veram incurrunt, instar ferarum, quae circumdantur pinnis, ut cogantur in retia. Ex recentiotibus Pierius, Hierogl. l. 1. Nempe comparatum id retis genus vel ut ferae in veros casses vanô hôc terrore impellerentur, quos vicinis in locis occultabant, ut Lycophron. innuit: vel, dum latratu canum, attonitae insequentem hastatum a tergo equitem fugiebant et circum lineam vagabantur, ab occultis sagittariis certô ictu sternerentur. Nec vero in venatu solum, sed etiam in piscatu, Formidinis istiusmodi seu versicoloris lineae usum, ostendit Oppianus praefatus, Halieut. l. 4. v. 576. ubi ὀρόωσαι, videntes, inquit.

Σχοἰνους κινυμένας, ἀνεμώλια δείματ᾿ ἔχουσας,

Funes agitatos varios metus habentes.

At frequentior receptiorque in re Venatoria usus. Namque praeter citatos Lucanus, l. 3. v. 437.

———— Sic dum pavidos formidine cervos

Claudat odoratae metuentes aera pennae.

Et ambitiosius multo Ausonius, Epist. 5. ad Theonem,

An cum fratre vagos dumeta per avia cervos

Circumdas maculis et multâ indagine pinnae?

Aut suumantis apri cursum clamoribus urges,

Subsistisque fero? moneo tamen, usque recuset

Stringere fulmineo venabula cominus hosti etc.

Istiusmodi proin Versicolores lineae, ut et venabula, canesque venatici cum retibus Dianae, venationum Praesidis, statuae olim addita. Vide Thomam Dempster. Paralipom. in Rosin. l. 2. c. 8. ut et supra, vocibus Bersa Formido etc.